Ka përfunduar regjistrimi i popullsisë në 34 komuna të Kosovës duke përfshirë komunat me shumicë serbe përveç atyre në veri të Kosovës. Procesi i nisur me 1 prill, ishte parashikuar të përfundonte me 15 prill por regjistrimi u shty në shtatë komuna për katër ditë për shkak të ankesave të qytetarëve se nuk ishin përfshirë në këtë proces.
Të dhënat paraprake të regjistrimit pritet të bëhen publike në muajin qershor ndërsa ato përfundimtare do të publikohen në vitin 2013-të. Bazuar në ligjin për regjistrimin e popullsisë Enti i Statistikave të Kosovës është institucioni kompetent i cili pas vërtetimit të saktësisë dhe vlefshmërisë për të dhënat do të ofrojë të dhënat paraprake deri më 30 qershor të këtij viti.
Në procesin e regjistrimit të popullsisë, ekonomive familjare dhe banesave nuk janë përfshirë tri komunat në veri të Kosovës. Zyrtarë të Entit të Statistikave të Kosovës thanëse janë duke u bërë përgatitjet edhe për fillimin e regjistrimit për veriun e Kosovës, por nuk kanë dhënë detaje të tjera.
Regjistrimi i popullsisë në Kosovë kryhet 30 vjet nga regjistrimi i fundit./Shekulli/
